Martin karhumuistelo

Villiäki villimpi Lapin luonto onnistuu yllättämhään meät paikallisekki kerta toisensa jälkheen.

Tämä tapahtu sen kerran ko met olima Vertin kans jossaki Ruuhijärven takana tipuja tiiraamassa. Son ainaki se meän virallinen selitys, jos met sattusimma vaikka joskus tästä kuulustelhuun joutumhaan.

No, met näimä sielä yhen petäjän juurela karhun paskaa ja aattelimma että jo vain on kumma homma, ei täälole karhuja nähty kesäsin vuosikymmenhiin. Mistä se paska on tänne tiensä löytäny?

”No luulis että karhusta vissiinki”, viisasteli Vertti.

Sollu mikhään, met painatimma miehissä puskista läpi ja eikhään se karhu ollu sielä toisela puolela, paskala taas.

Se ko näki meät, niin se poka hyppäs persettä pyhkimättä takajaloilensa, ja murahti meile että helvettiäkös tet pojat siinä oikheen tuletta rauhallista karhua kiusaahmaan, etes paskarauhaa tässä saa. Sano meile, että menkää tekki kotia siittä, hänki mennee siitä paikasta takasin nukkumhaan.

Met sanoima karhulaiselle, että jo vain on silläki ihmeelliset nukkuma-ajat, ko nyt on elokuun loppua, eikä täälä ole vielä luntakhaan, kattos vähän ympärilheen. Karhu tokas siihen, että no voi helevetti, niivvain onki, arveli että oli tainnu nukkua vähän pomhiin…

Sitteppä meän käsissä oli vähän toisenlainen pommi. Mietimä Vertin kans päät puhki, että mitäs met nyt tehemä, ko karhua mettäävät pistävät tuon tuosta lihoiksi heti ko näkevä. Karhu sano siihen, että oottakaapa pojat vähäsen, hän uipasee Tornionjoen yli Ruothiin turhvaan, net ko ei sielä vielä mettää karhuja aivan vähhään aikhaan.

Met sanoima sille että ei tarvitte kuoma-hyvä uija, menet vain pokkana rajasillan ylitte niin ei etes turkki kastu. Pakkasimma karhun meän tiisseli-Ransitin perhään, kärräsimmä meän puolen raja-aseman etheen ja näytimmä että tuosta vain etheenpäin ja ylitte.

No karvaturri kiitteli hövelisti ja köpötteli siltaa pitkin toisele puolele. Vielä heilautti tassua hyvästiksi ko pääsi Ruottin tulliaseman kohale. Ja rykäs paskat siihen aseman nurkale. Met annoima isot aplootit, niin karhule ko jöötillekki.

Soli kuule parhaimanlaatusta pohjoismaista yhteistyötä, näessie.

Jaa, vai että veän nenästä?

No niin vain veänki, se minun kaveri oli kyllä tosipuhheissa Niemelän Pertti eikä Juusolan Vertti.

IE

Kuva: Lolame / Pixabay

Add a Comment

Sähköpostiosoitettasi ei julkaista. Pakolliset kentät on merkitty *